Macehuallahtolpohualiztli nozo Catálogo de las Lenguas Indígenas Nacionales
-
In nepapan tlaman in quenin tlahtolo macehuallahtolli ipan Mexihco, in quenin ica inehuiyan inon tlahtolli motocaytia huan itlalnantzin in canin tlahtolo.
Nican hueliz ticahciz inon Macehuallahtolpohualiztli ica PDF (2 MB)
-
In tenahuatilli tlein nican tiquitztoc zan ce itlacotonal in documento Catálogo de las lenguas indígenas nacionales: Variantes lingüísticas de México con sus autodenominaciones y referencias geoestadísticas. in tlein oteixnextili ipan Diario Oficial de la Federación. Inon documento omochiuh ic oupa huan itlamiyan tequitl tlein ica in Instituto Nacional de Lenguas Indígenas (INALI), yuhquin quihtohua tlahtolnamictiliztli tlein omotlali ipan Consejo Nacional iaxca inehuiyan INALI, yehhua quitlacamati tlanahuatilli in tlein quihtohua mochihuaz inon "Macehuallahtolpohualiztli" nozo "Catálogo de lenguas indígenas mexicanas", inon tlanahuatilo ipan tlaxelolli 20 ipan Tlanahuatilli itechpa Iminmelauhcayo in macehualtin itechpa imintlahtol, caxtillantlahtolcopa Ley General de Derechos Lingüísticos de los Pueblos Indígenas (LGDLPI).
In INALI amoxcopa oquiixnexti in Catálogo de lenguas indígenas mexicanas: Cartografía contemporánea de sus asentamientos históricos . yuhquin ic achto itlaxelol tequitl tlein oquichiuh ipan xihuitl 2005. Inin tequitl motecpana ica 150 mapas tlein oquichiuhque ica tetlahtlaniliztli tlein oquichiuh ipan xihuitl 2000 in Instituto Nacional de Estadística, Geografía e Informática. Ipan inon mapas hueliz moahciz cehce altepemeh in canin cequintin tlacah tlahtohuan iminnantlahtoltzin, in canin ye huehcauh ipan inon tlalli omochantihque, omocauhque imincoltzitzihuan ipan totlalnantzin.
Ipan ic ome itlaxelol tequitl, itechpa inin tlacotonalli, tequitihque itechpa in quenin tlatlaman huan nepapan tlahtolo in macehuallahtolli tlein monelhuayotia ipan totlalnantzin.
Inon miac tlatehtemiliztli tlein omochiuh ixquichca axcan, noihqui tetlahtlaniliztli huan itequiuh tlein oquichiuh INALI ihcon hueli oquichiuh in Catálogo, nochi inon otechilhui ica inecuelmolol totlalnantzin itechpa macehuallahtolli oc achi mahchantoc huan amo in quenin titlanemiliayah axcan. Noihqui amo melahuac nochi itechpa macehuallahtolli, amo melahuac in tlein ticmatiyah nozo in tlein ticnemiliayah itechpa inon tlatlaman huan nepapan macehuallahtolli ipan Mexihco totlalnantzin; ce nezcayotl, ipan itlaxelol cahuitl tlein itoca virreinal, nozo achtohui, monemiliaya ica nochtin macehualtin tlahtohuan "zan ce macehuallahtolli" –zan yuhquin, yecmelauh ihcuitic-, huan amo quiyecmatiyah ica onca nepapan tlahtolli huan tlatlaman tlahtolo, ipampa ihcon tlatlaman itlalnan, inelhuayo huan itlacayo cehce tlahtolli yuhquin mochihua ipan nochi totlalticpac.
Yehica, in INALI oquipancui quipohuaz cehce inon nepapan tlahtolli ipan cehce macehualaltepemeh ipan Mexihco ica inin yei tlaxelolli, itechpa ce tlapohualiztli tlein pehua ahcopa huan tlami tlatzintla:
-
Inon tlamatiliztli itechpa inon nepapan macehuallahtolli noihqui in quenin tlatlaman tlahtolo, yehhua oquipalehui ihcon cualli omochiuh in Catálogo noihqui inon tlamatiliztli melahuac tlapalehuiz ihcuac monequi quiyancuicachihuazque. Axcan nican teixnextililoz inin Macehuallahtolpohualiztli nozo Catálogo ica yei tlaxelolli.
Icenyeliz tlahtolli nozo Familia lingüística
Inin tlaxelolli familia lingüística yehhua oc achi hueyi huan occequin tlaxelolli amo ihcon ipan inin tequitl. Inin tlaxelolli itechpa icenyeliz tlahtolli quihtoznequi ihcuac cequin macehuallahtolli zan tepitzin ihcuitic ipampa zan ce inelhuayo, ipampa inehuiyan inantzin.
Onca 11 icenyeliz macehuallahtolli tlein quipia inelhuayo nican Cemanahuac, nican tenehualo ipampa cehce inon cenyeliztli quiixnextilia mazque zan ce iconetlahtol ipan Mexihco totlalnantzin. Inon tlahtolcenyeliztli nican ca, mah Mictlampa tipehuacan huan mah Huitztlampa titlamican:
-
In quenin itoca inechicol tlahtolli nozo Agrupación lingüística
In agrupación lingüística yehhua in tlaxelolli ome ipan inin Macehuallahtolpohualiztli. Inin tlaxelolli quiihtoznequi ihcuac nochi tlaman tlahtolo ce macehuallahtolli quimacan zan ce itoca, noyuhquin ica inon tocayitl quinixmatin imacehualnechicol.
Yehica, in agrupaciones lingüísticas tlein pohualo ipan inin Catálogo, itech pohui nozo tlahtohua itechpa ce macehualnechicol nozo macehualaltepetl huan inin nechicol nozo altepetl hueliz quipia ome yei tlaman in quenin tlahtolo inehuiyan inantlahtoltzin. Ce nezcayotl, in agrupación lingüística tlein itoca tepehuah intech pohui in macehualtin tlein nochipa tiquinixmatin ica intoca tepehuah –yehica ihcon itoca iminnechicol- No ihcon inin agrupación lingúística tepehuah, quipia cequin tlaman in quenin tlahtolo imacehuallahtol, inon momati ihcuac tlahtolmatinih quitehtemohuan inin macehuallahtolli, noihqui itechcopa inemiliz inin macehualaltepetl; inon tlamatiliztli itechpa nepapan macehuallahtolli techilhuia ica inin tlahtolli quipia yei tlaman in quenin tlahtolo. Occe nezcayotl, axcan itechpa agrupación lingüística maya, inin intech pohui in macehualtin tlein noyuhquin intoca maya, ipan totlalnantzin mochantian ipan Yucatan, amo quipia miac tlaman nozo zan tepitzin, in quenin tlahtolo imintlahtol, yehica ipan inin Catálogo moihtohua, inon macehualnechicol quipia zan ce tlaman in quenin tlahtolo imintlahtol.
Monequi nican tiyequihtozque ome tlamantli itechpa imintocay in macehualnechicolmeh. Achtopa, ihcuac ce nechicol nozo ce altepetl zan ihcui itoca yuhquin occe macehualnechicol, ihcuacon omotlali occe tlacoton nozo mohueytilia itocay, in quenin quihtohua tlanahuatilli hueliz mochihuaz ixpan inin necuelmolol; ihcon itech mochihua ipan macehualaltepetl nozo macehualnechicol chontal de Oaxaca (icenyeliztlahtol chontal tlein itech pohui Huaxyacac) huan chontla de Tabasco (icenyeliztlahtol chontal tlein itech pohui nantlahtolli maya). Ic ome, itechpa in agrupaciones lingüísticas tlein macehuallahtolli oc achi tlahtolo ipan occe tlalnantzin, ihcuac moihcuilohua itocay monequi tlepanitaloz tlanahuatilli tlein quihtohua quenin quiyequihcuilohuan in macehuallahtohque tlein amo mexihcoehuanih. Yehica, ihcuac moihcuilohua macehuallahtolli tlein pohui Cuauhtemallan, quiahxiltian itlanahuatil Academia de las Lenguas Mayas de Guatemala, tlein omochiuh ihcuac omocentlalihque huan oquitlahtolnamiquihque ce amatl itoca Acuerdos de Paz Firme y Duradera, ipan diciembre ipan xihuitl 1996; inon tlanahuatilli quihtohua, achtopa, monequi moihcuilohua itocay inon macehualnechicol ica tlahcuilolli tlein pohui itlahtolmachiyo inon altepetl nozo inon nechicol tlein quipia inelhuayo maya ompa Cuauhtemallan, ic ome, ihcuac moihcuilohua itocay monequi pehuaz ica tlahcuilolli hueyi. Itechpa macehualaltepetl Kickapoo anglotlanahuatilcopa moihcuilohua itocay, ipampa inon macehualtin oquipancuihque iminpilhuan oc achi cualli momachtizque ipan tlalnantzin Estados Unidos ne Mictlampa.
Inon 68 macehualaltepemeh nican teixnextililoh, tlahtolmachiyotica tecpanalo imintocay:
-
Variante lingüística
In quenin tlatlaman macehuatlahtohua Inin tlaxelolli variante lingüística yehhua oc achi monequi moyequihtohua ipan inin tequitl. Yehhua quihtoznequi ce tlaman in quenin tlahtolo ce macehuallahtolli: a) ihcuac tlatlaman tecpanalo huan tlahtolo ce tlahtolli, amo yuhquin occe tlahtolli iicniuh tlein zan ce inelhuayo; b) ihcuac ce macehualahtohuani quiahci inezcayo ipan ce macehualnechicol itechpa in quenin, canin, quezqui, aquin huan tlein tlaman tlahtolo inantlahtoltzin, amo yuhquin occe tlahtolli.
Inin tlaxelolli variante lingüística quitequiuhtian in macehualtin tlein tlahtohuan ica imintlahtoltzin, in tlein quimatin ome tlahtolli, macehuallahtolli-coyotlahtolli, ihcuac quitenehuan in quenin tlahtolo ce macehuallahtolli, cox ihcuitic nozo amo, in quenin motecpana, in quenin moihcuilohua, in quenin tlahtolo nozo occe inezca itechpa occe macehualnechicol tlein inehuiyan inelhuayo.
In quenin tlahtolo ce macehuallahtolli yehhua melahuac technextilia inon nepapan tomacehuallahtol huan tonezcayo ipan Mexihco. Ipampa in tlatehtemoliztli itechpa inon nepapan macehuallahtolli ipan totlalnantzin huan ipampa monequi tiquiixnamiquizque ixtlahuelli itechpa macehuallahtolli, in INALI quihtohua ica inon cehce tlaman in quenin tlahtolo macehuallahtolli monequi tiquitazque yuhquin occe tlahtolli, ipan tlamachtiloyan, teixpantiloyan, tepahtiloyan huan ipan occe inetetlayecoltiliz altepepan, noihqui ihcuac ce macehualli monequi quitlahtlaniz tenahuatilli ce amatl nozo occe itlah.
Ipan inin tlacoton, cehce macehuallahtolli quipia ome inezca: a) itocay ica inehuiyan itlahtol nozo in quenin cehce macehuallahtolli quihtohua yehhua motocaytia ica inantlahtoltzin; b) tenahuatilli itechpa canin tlahtolo, nozo tlein itlalnantzin in canin momati inon macehuallahtolli, quenin itoca cehce tlalli huan cehce altepetzin in canin ca cehce inon macehuallahtolli.
In tlaa ticnequi tiquixmatiz inon cehce tlaman in quenin macehuallahtolo, xictemo ipan agrupaciones lingüísticas.