Ku péektsilta’al tumen INE yéetel INALI U sutk’esa’al u yóox Debate’il ichil le máaxo’ob u k’áato’ob ka yéeyako’ob ti’al u noj jala’achil le lu’uma’, ichil óop’éel máasewal t’aano’ob ti’ le noj lu’umila’

* Ya u ts’o’okol u meyajilo’ob u sutk’esa’al le debateso’ob ichil náhuatl, maaya t’aan yéetel tsotsil

* U noj mola’ayil yéey táambale’ ku béeykuntik u yantal keetik páajtalil je’ex jets’a’an tumen Consejo General Electoral ti’al le meyajilo’oba’

 

17 ti’ mayo tu ja’abil 2024.- U noj mola’ayil yéey táambal (INE), yéetel u yáantajil u noj mola’ayil Instituto Nacional de Lenguas Indígenas (INALI), yan u péektsiltik u sut t’aanil ichil u máasewal t’aanilo’ob maaya t’aan, náhuatl yéetel tsotsil ti’al u yóox debate ichil le máaxo’ob u k’áato’ob ka yéeyako’ob ti’al u noj jala’achil le lu’umila’ yan u yúuchul le domingo 19 ti’ mayo ku taala’ tu kúuchil Centro Cultural Universitario Tlatelolco, las 20:00 horas.

Yéetel le ts’ook meyajila’ ku ts’o’okol xan le jets’ t’aanil éejenta’ab tumen le mola’ayil yéey táambal ti’al le debateso’ob ichil le máaxo’ob u k’áato’ob ka yéeyako’ob ti’al u noj jala’achil le lu’umila’, ku kaxantik u chíimpoltik u páajtalilo’ob politico’ob yéetel ka u táakbesuba’ob ti’ yéey táambal  beeyxane’ ti’al u ts’aabal ojéetbil meyaj ti’ máasewal máako’ob ti’ le noj lu’umila’.

Beeyxane’ u chíimpolta’al u meyajil u péektsilta’al ba’alo’ob ichil máasewal t’aano’ob bey u t’aanilo’ob noj lu’um, je’ex jets’a’an tu noj a’almaj t’aanil Ley General de Derechos Lingüísticos de los Pueblos Indígenas.

Yo’olal le je’elo’ u mola’ayilo’ob INE yéetel INALI ku péektsiltiko’ob ichil le k’iino’oba’ ti’ u jeejeláas chíikulilo’ob meyaj yéetel u péektsilta’al ba’alobe’, le u máansa’al le sut t’aanil ichil juunjump’éel ti’ le óoxp’éel t’aan yan u sut k’esa’alo’ , le je’eloba’ yan u páajtal u cha’antalo’ob tu súutukil u yúuchulo’ ti’ u chíikulil YouTube ti’ le mola’ayila’ (INETV) beeyxan ti’ le jeejeláas chíikulilo’ob redes sociales yéetel ti’ u nu’ukbesajil https://centralelectoral.ine.mx/.

Le chíikulilo’ob tu’ux je’el u béeytal u cha’anta’al le sut t’aanilo’ leti’e je’eloba’:

* Sut t’aanil ichil náhuatl: https://youtube.com/live/RTOPPE1GGmw?feature=share.

* Sut t’aanil ichil maya t’aan: https://youtube.com/live/Y2qU3OwO9SQ?feature=share.

* Sut t’aanil ichil tsotsil: https://youtube.com/live/izgNWT6g4aY?feature=share.

Beeyxane’ u láak’ páajtalil ti’al u yantal keetil ichil le debateso’ob tu jets’aj u noj mola’ayil INE leti’e’ u máansa’al ichil u t’aanil Lengua de Señas Mexicana, ti’al le máaxo’ob ku k’a’abetchajal xan, le je’ela’ je’el u páajtal u cha’anta’al ti’ u chíikulil https://youtube.com/live/g5h5mvIxtaE?feature=share.

Je’ex úuchik ti’ le yáax ka’ap’éel ketlam t’aan ts’o’ok u beeta’alo’, yéetel u yáantajil u múuch’kabil Red de Radiodifusoras y Televisoras Educativas y Culturales de México (RED México), yan u béeykunta’al u cha’anta’al le sut t’aan ku beetbilo’ ti’ maanal 12 chíikulilo’ob cha’an ti’ le noj lu’umila’, ichil le je’eloba’ le ku jach cha’antalo’ob je’ex TV UNAM.

Beeyxane’ yan u béeykunta’al u yáantajil u noj mola’ayil Instituto Nacional de Pueblos Indígenas (INPI) ti’al u payalt’aanta’al le máaxo’ob ku ch’enxikintiko’ob u chíikulilo’ob radiodifusoras culturales ti’al u yu’ubiko’ob le sut t’aan ku yúuchulo’ tu chíikulilo’ob cha’an ti’ INI yéetel ti’ INPI beeyxane’ ti’ u nu’ukbesajil máasewal radio’e’ Ecos Indígenas (https://ecos.inpi.gob.mx/).

Ku kaxanta’al yéetel le je’ela’ je’ex ti’ u ka’a debate’il ichil le máaxo’ob u k’áato’ob ka yéeyako’ob ti’al u noj jala’achil le lu’umila’ ka je’ets’ek tumen INPI le xot lu’umilo’ob tu’ux ku máansa’al le sut t’aan ku yúuchulo’ ichil u máasewal t’aanilo’ob náhuatl, maaya t’aan yéetel tsotsile’ ikil u chíimpolta’al le t’aan ku t’a’anal ti’ le xot lu’umilo’.

Ti’ le je’ela’ ku ya’alal le aj sut t’aano’ob ku táakbesuba’on ti’ u yóox debate’il ichil le máaxo’ob u k’áato’ob ka yéeyako’ob ti’al u noj jala’achil le lu’uma’.

 

Aj sut t’aan	Máasewal t’aan
Irla Élida Vargas Del Ángel	Náhuatl
Gilberta Mendoza Salazar
Martha Martínez Hernández
Anselmo Clemente De Jesús
Sary Lorena Hau Ucan	Maayat?aan (maya)
Jemina Abigail Peraza Chan
Ramón Chan Briceño
Elí Concepción Casanova Morales
Lucía Moshán Vargas	Bats?i k?op Tsotsil
Reyna Gomez Ruiz
Esmeralda Méndez
Cristóbal Hernández Pérez

Tu yóox debate ichil le máaxo’ob u k’áato’ob ka yéeyako’ob ti’al u noj jala’achil le lu’umila’ yan u máansa’al tuláakal noj lu’um yéetel ku k’aaba’tik “U meyajil Democracia yéetel jala'ach: tsikbal ti'al u ma'alobkinsa'al meyaj, yéetel ti’ le je’ela’ le máaxo’ob u k’áato’ob ka yéeyako’obo’ yan u ketlam t’aano’ob ichilo’ob yo’olal política social; x ma’ jets’ óolil yéetel u talamil crimen organizado; U bin máak táanxel lu'um yéetel múul meyaj ichil noj lu'umilo'ob beeyxane’ Democracia, múul meyaj yéetel jeejeláas tuukulilo'ob yéetel u ja'ats'al u muuk'il noj lu'um.

Yéetel le sut t’aan ichil máasewal t’aano’ob yéetel u máansa’al ichil u t’aanil Legua de señas Mexicana’e’, u noj mola’ayil INE ku béeykuntik le jets’ t’aan beeta’an ti’al u yantal keetil páajtalilo’ob ichil le meyajilo’oba’ je’ex tu jets’al u múuch’kabil Consejo General.

-o0o-